Фәрит Хәнифов Казан-Ижевск-Казан маршрутында кулланылачак яңа электропоездларны карады
Халыкка транспорт хезмәте күрсәтүнең сыйфатын арттыру максатында Горький тимер юлына – «Россия тимер юллары» ААҖ филиалына җитештерүче завод тарафыннан ЭПЗД сериясендәге ике яңа электропоезд җибәрелде, алар «Содружество» АҖ шәһәр яны пассажир компаниясе тарафыннан Казан-Ижевск – Казан маршрутында искергән ЭД9М серияле электропоездлар урынына файдаланылачак.
Бүген ТР транспорт һәм юл хуҗалыгы министры Фәрит Хәнифов һәм Горький тимер юлы — «РЖД» ААҖ филиалы башлыгы Сергей Дорофеевский яңа хәрәкәт итүче составны карадылар.
Яңа буын хәрәкәтчән составы салон эчендә һәм түбәдә видеокүзәтү камералары белән җиһазландырылган, бу барлык заманча транспорт куркынычсызлыгы таләпләренә туры килә. Керү ишекләренең аяк табаннарында түбән платформага чыгуны яхшырта торган өстәмә кузгалмалы баскыч бар.
Вагоннар яңа эргономик креслолар, сыйдырышлы багаж киштәләре, велосипедлар ташу урыннары, һаваны зарарсызландыручы климат системалары белән җиһазландырылган. Салонда пассажирлар өчен электрон җайланмаларны зарядкалау өчен USB-разъемнар бар.
Состав шулай ук аз хәрәкәтләнүче пассажирларга уңайлы йөрү өчен җиһазландырылган: беренче һәм соңгы вагоннарның тамбурларында аз хәрәкәтләнүче гражданнарны утырту һәм төшереп җибәрү өчен махсус электр күтәргечләр каралган.