Татарстан Республикасы Транспорт һәм юл хуҗалыгы министрлыгы

Татарстан “Европа-Көнбатыш Кытай” транспорт коридорының төп ноктасы булачак

2013 елның 10 декабре, сишәмбе

“Транспорт атнасы 2013” халыкара форум кысаларында Татарстан Республикасы транспорт һәм юл хуҗалыгы министры Ленар Сафин “Европа-Көнбатыш Кытай”транспорт коридоры составындагы инвестиция проекты белән таныштырды.

Яңа түләүле трасса М-7 ″Волга», Казан–Оренбург” һәм М-5 «Урал» федераль автомобиль юлларын берләштерәчәк. Аны куллануга кертү белән Европа илләреннән Азиягә һәм кире якка автомобиль транспорты белән йөк ташу 14-18 көнгә кадәр кыскарачак. Бүгенге көнгә әлеге арада йөк ташу диңгез аша башкарыла һәм бер айдан артык вакыт сарыф ителә.

Татарстан Республикасы транспорт һәм юл хуҗалыгы министры Ленар Сафин билгеләп үтүенчә, Татарстан Россия Федерациясе субъектлары арасында беренче булып әлеге коридорны бәяләде. Республикада халыкара транспорт коридорын булдыру кысаларында 2005 елдан бирле «Шәле-Баулы» түләүле автомагистраль төзелеше» дигән инвестиция проекты гамәлгә ашырыла, ул «Казан-Оренбург» федераль автомобиль юлының яңа маршруты үсешенә өлеш кертә. Трассаның гомуми озынлыгы 294 чакрым тәшкил итә. Автомагистральнең техник категорясе – I-а. Хәрәкәт тизлеге – сәгатенә 150 чакрым. Хәрәкәт ешлыгы буенча тәүлегенә 35 меңгә кадәр автомобиль үтәр дигән прогноз ясала.

Бүгенге көнгә инде 100 чакрым участокта юл эшләре башкарылган. Мөһим булган ясалма корылмалар, тонелләр, транспорт чишелешләре төзелгән.

«Шәле-Баулы» түләүле автомагистрален кулланылышка 2018 елда кертү планлаштырыла.

Моннан тыш, “Европа-Көнбатыш Кытай”транспорт коридорын булдыру кысаларында Татарстан Республикасында «Свияжски төбәкара мультимодаль логистика үзәге» проектын төзү бара. Аны 2015 елга тәмамлау ниятләнә.

Әлеге инвестиция проектлары 2030 елга кадәр вакытта транспорт стратегиясен гамәлгә ашыру кысаларында Россия Федерациясенең бердәм транспорт системасын формалаштыруга юнәлдерелгән.

Матбугат үзәге.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ