«Җиңү паровозы» Әлмәткә һәм Бөгелмәгә киләчәк
Бөек Ватан сугышында Җиңүнең 80 еллык юбилее уңаеннан Куйбышев тимер юлы «Җиңү паровозы» проектын башлап җибәрә. 2025 елның 28 апреленнән 5 маена кадәр бәйрәм ретро-составы магистральнең 8 эре станциясендә булачак һәм дистәләгән кечкенә станция һәм авыллар аша 3000 чакрымга якын юл үтәчәк.
Быел «Җиңү паровозы» Бөгелмә һәм Әлмәт шәһәрләренә киләчәк. Бөгелмәдә поезд 30 апрельдә 15:00 дән 17:30 га кадәр, Әлмәттә - 1 майда 10:00 дән 13:00 гә кадәр булачак.
Ретро поезд составында уникаль экспонатлар урнаштырылачак. Алар арасында Лэнд-Лиз кысаларында Советлар Союзына куелган автомобиль-амфибия дә бар. Бу машина реаль хәрби гамәлләрдә катнашкан һәм нибары берничә экземплярда гына сакланып калган.
Традиция буенча Ретро-составны гамәлдәге «Лебедянка» паровозы алып барачак, ул 1945 елның җиңү мае стилистикасында бизәлгән. Эшелон составында «Үлемсез полк» пассажир вагоннары йөриячәк. Паровоз бригадасы Бөек Ватан сугышы чоры формасына киенәчәк.
Бәйрәм кунаклары өчен кыр кухнялары, Георгий ленталары өләшү, раритет ату коралы күргәзмәләре һәм беренче тапкыр балалар өчен лазертаг оештырылачак. Күргәзмәне шул чорның барлык төр гаскәрләренең хәрби формасын кигән профессиональ реконструкторлар озата бара. Кунакларга бәйрәм кәефен иҗат коллективлары бүләк итәчәк, алар барысы да яраткан вокаль һәм бию композицияләрен башкарачак.
Теләүчеләр уникаль хәрби экспонатлар белән фотога төшә һәм гамәлдәге паровоз кабинасына күтәрелә алачак.