Фәрит Хәнифов Түбән Камада транспорт һәм юл хуҗалыгы мәсьәләләре буенча зона киңәшмәсе үткәрде
Бүген ТР транспорт һәм юл хуҗалыгы министры Фәрит Хәнифов Түбән Кама муниципаль районы хакимиятендә 2025-2030 елларда Татарстан Республикасының Кама зонасында транспорт һәм юл хуҗалыгы мәсьәләләре буенча зона киңәшмәсе үткәрде. Анда Агерҗе, Актаныш, Алексеевск, Алабуга, Менделеевск, Минзәлә, Түбән Кама, Сарман, Спас, Тукай, Чистай районнарының башкарма комитетлары башлыклары һәм җитәкчеләре катнашты.
Киңәшмәдә 2025 елда һәм якындагы биш елга муниципалитетларда халыкка транспорт хезмәте күрсәтү һәм юллар белән тәэмин итү темасы буенча фикер алыштылар. Киңәшмәнең максаты - министрлык һәм республиканың төрле ведомстволарының муниципаль берәмлекләр белән үзара хезмәттәшлеген оештыру.
«Без Россия Федерациясе Президентының 2030 елга кадәрге чорга һәм 2036 елга кадәрге перспективага Россия Федерациясе үсешенең милли максатлары турында» 2024 елның 7 маендагы 309 номерлы Указын гамәлгә ашыру өчен барысын да эшләргә тиеш. Әлеге Указ нигезендә барлык 6 еллык программалар - федераль, республика, муниципаль проектлар гамәлгә ашырыла. Үз эшебезне ике комиссия – ТР Рәисе Рөстәм Миңнеханов җитәкләгән «Тормыш өчен инфраструктура» юнәлеше буенча РФ Дәүләт Советы комиссиясе һәм Бурятия Республикасы башлыгы Алексей Цыденов җитәкләгән «Нәтиҗәле транспорт системасы» комиссиясе белән бергә алып барачакбыз», - диде Фәрит Хәнифов үзенең сәламләү сүзендә.
Транспорт тармагы өлкәсендә министр 2030 елга шәһәрләрдә һәм агломерацияләрдә җәмәгать транспортының хәрәкәтчән составының 85% норматив хәлгә китерү бурычы барлыгын сөйләде. Шулай ук цифрлы платформа булдыру бурычы да бар.
Шулай ук төбәкара, муниципальара пассажирлар йөртү, тимер юл һәм су транспорты темалары буенча фикер алыштылар, аерым алганда мәктәп, вахта транспорты һәм башка мәсьәләләр каралды.
Юллар төзелеше өлкәсендә министр республиканың юлларны норматив хәлгә китерү планын кимендә 85% ирешүен әйтте һәм әлеге күрсәткечне саклап калу кирәклеген билгеләп үтте. «Тормыш өчен инфраструктура» илкүләм проекты буенча 2030 елга төбәк юлларының 60% норматив күрсәткечләргә җавап бирергә тиеш.
Аерым алганда, катнашучылар юл-урам челтәрен ремонтлау һәм карап тоту мәсьәләләрен карадылар, шулай ук муниципаль юлларны саклау һәм өстенлекле итү программасы турында фикер алыштылар.