Казанда Вознесение тракты буенча хәрәкәт ачылды
Бүген, 12 октябрьдә, «Имин сыйфатлы юллар» милли проекты кысаларында Вознесение трактатының яңа участогы тантаналы рәвештә ачылды. Бу чарада Татарстан Республикасы Рәисе Рөстәм Миңнеханов, Казан шәһәре мэры Илсур Метшин катнашты.
Вознесение трактатының яңа участогы (Гвардия урамыннан Җиңү проспектына кадәр) юл хуҗалыгы тармагы хезмәткәрләренең бөтенроссия съезды кысаларында видеоконференцэлемтә режимында ачылды.
Чарада Россия Транспорт министрлыгы, Федераль юл агентлыгы, федерация субъектлары җитәкчелеге вәкилләре катнашты.
Видеоконференцэлемтә аша чыгыш ясап, Росавтодор башлыгы Роман Новиков барысын да һөнәри бәйрәм - юл хуҗалыгы хезмәткәрләре көне белән котлады, шулай ук Грозныйда уза торган «Юл-2023» съезды кысаларында барлыкка килгән традиция буенча юл тармагы өчен әһәмиятле берничә объект ачыла, дип искәртте.
Вознесение трактына шәһәр җитәкчелеге зур өметләр баглый. Трасса шәһәрнең эре транспорт артерияләрен кисеп, шәһәр районнарын тарихи үзәк белән тоташтыручы итеп проектлана. Төрле юнәлешләр буенча йөрү вакытын кыскартуның мөһим эффекты көтелә.Шулай ук шәһәрдән чыгу мөмкинлеге дә исәпкә алынган, урам-юл челтәренең тыгынлык участокларын узып, бу юл йөрү өчен вакытны экономияләүгә китерәчәк.
Моннан тыш, магистраль элеккеге сәнәгать зоналарын үстерүгә һәм торак төзелешенә этәргеч бирәчәк.Вознесение трактының җәлеп итү зонасында төзеләчәк торакның гомуми күләме 2,3 млн. кв. м. тәшкил итәчәк.
«Юл хезмәткәрлеренең һөнәри бәйрәме алдыннан без бүген Вознесение трактының иң катлаулы участогында хәрәкәтне башлап җибәрәбез, ул безнең юллар салучылар тарафыннан федераль үзәк ярдәме белән гамәлгә ашырылды, - диде Рөстәм Миңнеханов. - Һәм без Президент Владимир Путинга, Россия Хөкүмәтенә, Транспорт министрлыгына һәм Федераль юл агентлыгына чын күңелдән рәхмәтле. Проект тормышка ашырылды. Бу гаять катлаулы участок 13,4 млрд сум тора. Һәм, әлбәттә, аның дәвамы бар, һәм без алга таба да ярдәм сорап мөрәҗәгать итәчәкбез. Барыгызга да рәхмәт!»