Казанда милли проект буенча Болотников урамын тулысынча төзекләндерәчәкләр
«Имин һәм сыйфатлы автомобиль юллары» илкүләм проект буенча 1,44 км озынлыктагы Болотников магистраль урамын төзекләндерү дәвам итә.
Ремонт барышында гамәлдәге машиналар йөрү өлешен һәм гомуми мәйданы 27649 кв. м булган съездларны ремонтлау барышында ЩМА-20 югары сыйфатлы асфальт-бетоннан яңа катлам, 2770 кв. м мәйданлы тротуарларда комлы асфальт-бетон катнашмасы җәеләчәк. Шулай ук яңгыр кабул итү һәм карау коеларын төзекләндерү, 1684 м борт ташларын, 1628 м тротуар ташларын алыштыру, 350 метр озынлыктагы рәшәткәле коймаларны урнаштыру каралган. Хәрәкәт иминлеген тәэмин итү өчен 167 юл билгесе куелачак. Шулай ук ремонт кысаларында ике тукталыш платформасын төзекләндерү һәм автопавильон урнаштыру планлаштырылган.
Болотников урамы Казанның Киров районында урнашкан һәм 17 нче гасыр башында крестьян сугышы җитәкчесе Иван Болотников хөрмәтенә аталган.
Исегезгә төшерәбез, агымдагы елда Казан агломерациясендә 91,7 км озынлыктагы 28 объект ремонтланачак, шул исәптән 40,4 км озынлыктагы 10 объект – Казанда. Аерым алганда, ремонт программасына Зорге, Патрис Лумумба, Гвардия, Тэцевская, Җиңү проспекты һ.б. урамнар кергән. Ремонт нәтиҗәсендә агломерация юлларының 84% ы нормативларга туры киләчәк.