Татарстан Республикасы Транспорт һәм юл хуҗалыгы министрлыгы

Горький тимер юлының Казан төбәге автомобиль йөртүчеләргә тимер юл кичүләре аша чыкканда юл йөрү кагыйдәләрен үтәргә киңәш итә

2015 елның 19 феврале, пәнҗешәмбе

2015 ел башыннан Горький тимер юлының Казан төбәге полигонында тимер юл кичүләре аша чыкканда 3 юл-транспорт һәлакәте теркәлгән. Әлеге вакыйгаларда 1 кешенең гомере өзелгән.

Ике юл-транспорт һәлакәте Татарстан Республикасы территориясендә теркәлгән. 10 нчы февральдә Химическая һәм Восстание станцияләре арасындагы тимер юл кичүендә “Рено Логан” автомобилен йөртүче якынлашып килүче манёврлар ясый торган тепловоз каршысына чыга. Йөртүчегә зыян килмәгән.

Агымдагы елның 10 нчы гыйнварында Яңа Аракчино-Лагерная станцияләре арасындагы 6 км тимер юл кичүендә булган юл һәлакәте үлем очрагы белән теркәлә. “ВАЗ-2114” маркалы җиңел автомобильне йөртүче тимер юл кичүендә юл чыгарга ярамаганын кисәтеп торган билгегә игътибар итмичә, Яшел Үзәннән Казанга таба хәрәкәт итүче электровоз каршысына чыга. Машинист поездны туктату өчен тиз арада тиешле техник чаралар күрсә дә, ара якын булганлыктан машина белән поезд бәрелешә. Нәтиҗәдә, 1985 елда туган автомобиль йөртүченең гомере өзелә.

18 нче февральдә Чуваш Республикасында Яңачебоксар һәм Чебоксар II станцияләре арасындагы тимер юл кичүендә шулай ук юл-транспорт вакыйгасы теркәлә. “ВАЗ-2110” маркалы җиңел автомобильне йөртүче тимер юл кичүендә йөк поездының каршысына чыга.

Алда әйтелгән өч очракта да автомобиль йөртүчеләр үзләре юл-транспорт һәлакәтен китереп чыгаручылар. Юл-транспорт вакыйгасының төп сәбәпчесе - “кешелек факторы”: тимер юл кичүләрендә юл хәрәкәте кагыйдәләрен бозып, автотранспорт чараларын йөртүчеләрнең игътибарсызлыгы.

Чагыштыру өчен: 2014 елда бу вакыт аралыгында 2 юл-транспорт һәлакәте очрагы теркәлгән, 2 кеше зыян күргән.

Материалны“РТЮ” ААҖ филиалы - Горький тимер юлының Казан төбәге матбугат хезмәте тәкъдим итте.

БАРЛЫК ЯҢАЛЫКЛАРНЫ УКУ