Татарстан Республикасы Транспорт һәм юл хуҗалыгы министрлыгы

26 нчы октябрь - автомобиль һәм шәһәр пассажир транспорты хезмәткәрләре көне

2014 елның 25 октябре, шимбә

Татарстан Республикасы транспорт һәм юл хуҗалыгы министры Ленар Сафин һөнәри бәйрәмнәре белән автомобиль һәм шәһәр пассажир транспорты хезмәткәрләрен һәм ветераннарын котлады:

Хөрмәтле автомобиль һәм шәһәр пассажир транспорты хезмәткәрләре!

Сезне ихлас күңелдән һөнәри бәйрәмегез белән котлыйм!

Транспорт тармагы ышанычлы һәм сыйфатлы булсын өчен сез күп эшләдегез. Фидакарь хезмәтегез ярдәмендә өзлексез пассажирлар һәм йөк ташу оештырылды, торак пунктларны бәйләү, транспорт үтемлелеген тәэмин итү буенча эшләр башкарылды.

Сезнең күбегез Казанда Универсиада-2013, Сочида XXII Кышкы Олимпия уеннары һәм XI Паралимпия уеннарында хезмәт күрсәтүдә катнашты. Әлеге чараларда хезмәт күрсәтү югары дәрәҗәдә башкарылды. Бу хакта оештыручылар да, Уеннарда катнашучылар да күп тапкыр билгеләп үттеләр.

Татарстанда торак пунктларга транспорт үтемлелеген тәэмин итү өчен күп эш башкарыла. 2014 елда муниципалитетлар арасында йөрүче 154 маршрут оештырылды, аларда ГЛОНАСС системасы белән җиһазландырылган 470тән артык автобус хезмәт күрсәтә.

Пассажирларга хезмәт күрсәтү сыйфатын, безнең Татарстан шәһәрләре һәм районнарында экологияне яхшырту өчен мөһим проектлар гамәлгә ашырыла. Мәсәлән, газ ягулыгында эшләүче яңа автобуслар, троллейбуслар, трамвайлар сатып алына, Яр Чаллыда яңа трамвай юлы сузылды.

Шушы бәйрәм көнендә тармак ветераннарын, җитәкчеләрне, автомобиль һәм шәһәр пассажир транспорты предприятиеләре хезмәткәрләрен һөнәри бәйрәмнәре белән котлыйм. Сезгә, хөрмәтле коллегалар, нык сәламәтлек, бәхет, муллык һәм гөрләп алга баруыгызны телим!

Министрлыкның матбугат хезмәте.

БАРЛЫК ЯҢАЛЫКЛАРНЫ УКУ