«Татарстан Республикасында юл хәрәкәте иминлеген тәэмин итү чаралары турында» брифинг
Бүген ТР Министрлар Кабинетында «Татарстан Республикасында юл хәрәкәте иминлеген тәэмин итү чаралары турында» дигән темага брифинг узды. Чарада ТР транспорт һәм юл хуҗалыгы министры Фәрит Хәнифов һәм ТР буенча ЭЭМ ЮХИДИ идарәсе башлыгы - ТР буенча Юл хәрәкәте иминлеге баш дәүләт инспекторы Рөстәм Гарипов катнашты.
Фәрит Хәнифов Татарстанда юл хәрәкәте иминлеген арттыру чараларын гамәлгә ашыру турында сөйләде.
ТР буенча ЭЭМ Дәүләт автоинспекциясе Идарәсе белән 2025 елда төбәк әһәмиятендәге автомобиль юлларында булган юл-транспорт һәлакәтләренә анализ ясалды һәм 2026 елда гамәлгә ашырырга тәкъдим ителгән чаралар исемлеге билгеләнде.
"108 юл-транспорт һәлакәтен карау нәтиҗәләре буенча беренче чираттагы чараларны 30 участокта уздыру кирәклеге турында карар кабул ителде", - дип хәбәр итте Фәрит Хәнифов.
Бу юлның геометрик параметрларын үзгәртү, колейлыкны бетерү, ясалма яктырту һәм светофорлар урнаштыру, өстәмә юл билгеләре урнаштыру һәм ясалма тигезсезлекләрне җайлау.
«2025 елда каралган 14 участокта юл хәрәкәте иминлеген арттыру буенча чаралар гамәлгә ашырылды инде. 64 участокта чараларны үтәү таләп ителми", - дип ассызыклады министр.
«Тормыш өчен Инфраструктура» илкүләм проекты составына керүче «Төбәк һәм җирле юл челтәре» төбәк проектын гамәлгә ашыру максатларында 2026 елга программа буенча юл эшләренә - 20,77 млрд сум каралган, шуның 11,34 млрд сумы - федераль бюджеттан, 9,43 млрд сумы - республика бюджетыннан.
«Юл хуҗалыгын үстерүнең гомумсистема чаралары» төбәк проектын гамәлгә ашыру кысаларында 125,7 млн сум бүлеп бирелгән, шул исәптән 91,8 млн сум РФ бюджетыннан. Акчалар Казанда 12 һәм Яр Чаллыда 5 юл хәрәкәте белән идарә итүнең автоматлаштырылган системасы өчен җиһазлар китерүгә һәм монтажлауга юнәлдереләчәк.