Татарстанда быел илкүләм проект буенча 16 күпер корылмасы файдалануга тапшырылган
2025 елда «Тормыш өчен инфраструктура» илкүләм проекты кысаларында региональ һәм җирле әһәмияттәге гомуми файдаланудагы автомобиль юлларында 23 күперне норматив хәлгә китерү буенча эшләр башкарылды. Шуларның 16сында эшләр агымдагы елда 675 погон метр озынлыкта тәмамланган. 7 объектта эшләр дәвам итә, аларның гомуми озынлыгы - 446 погон метр, алар 2026 елда файдалануга тапшырылачак.
Региональ һәм җирле юлларда күперләрне үстерү кече шәһәрләр, авыллар тормышы һәм үсеше өчен тотрыклы, имин һәм уңайлы пространство булдыруда мөһим фактор булып тора. Менделеевск муниципаль районының Камай авылында Возжайка елгасы аша күпер, Балык Бистәсе муниципаль районының Ямаш авылында Һади Такташ урамындагы Ачиса елгасы аша күпер, Чирмешән муниципаль районында «Лениногорск-Чирмешән» автомобиль юлындагы инеш аша күпер шундый күперләргә мисал булып тора.
Төбәк әһәмиятендәге күперләрне норматив хәлгә китерү милли проектның мөһим өлеше булып тора. Алар елга һәм чокырлар аша вакытында үтүне тәэмин итеп, транспорт системасының тотрыклы эшләвен тәэмин итәргә мөмкинлек бирә.
Мәсәлән, Балтач муниципаль районында «Балтач – Әтнә» автомобиль юлында Арборка елгасы кушылдыгы аша күпергә, Кайбыч районында «Зур Кайбыч – Камыл» автомобиль юлында бөрле елгасы аша күпергә, Чистай муниципаль районында «Казан – Оренбург» – Чистай» автомобиль юлында инеш аша күпергә капиталь ремонт ясалган.
"Күпер корылмаларын норматив хәлгә китерү чаралары төбәкнең транспорт инфраструктурасын яхшыртырга һәм республика халкының тормыш сыйфатын күтәрергә, шулай ук «Тормыш өчен инфраструктура» илкүләм проектының максатчан күрсәткечләренә ирешергә мөмкинлек бирәчәк", - дип билгеләп үтте Татарстан Республикасы транспорт һәм юл хуҗалыгы Министрлыгының автомобиль юллары идарәсе башлыгы Кәрим Нурмөхәммәтов.