Татарстанда кайнар асфальт-бетон кулланып чокырларны ремонтлау эшләре башланды
Татарстанда төбәк юлларында кайнар асфальт-бетон кулланып чокырларны ремонтлау эшләре башланды. Моңа 10 асфальт-бетон заводын эшләтеп җибәрү ярдәм итте. Аерым алганда, республиканың Әгерҗе, Алексеевск, Әлмәт, Балтач, Бөгелмә, Кама Тамагы, Лаеш, Түбән Кама, Чирмешән, Чистай районнарында заводлар эшли башлады.
Төбәк әһәмиятендәге гомуми файдаланудагы юлларны ремонтлау өчен барлыгы 35 асфальт-бетон заводы бар, бүгенге көнгә алар барысы да 100% ка эшләтеп җибәрергә әзер.
«Кыш стандарт булмады, кар бик аз иде. Статистика буенча ноль градус аша күчүләр саны кыш айларында 47 цикл булган. Һәр күчеш ул юл өслеге өчен һәлакәтле булып тора. Тишемнәргә су тула һәм юл өслеге таркала. Хәзер юл төзүчеләр кайнар асфальт-бетон белән чокырларны ремонтлауга оператив рәвештә керештеләр. Безнең алда май азагына кадәр чокырларны төзекләндерүне тулысынча төгәлләү, горизонталь юл билгеләрен ясау бурычы тора», - дип сөйләде «Главтатдортранс» ДКУның эксплуатацияләү буенча директор урынбасары-автомобиль юлларын һәм күпер корылмаларын ремонтлау һәм карап тоту идарәсе башлыгы Зөлфәт Ханмурзин.
Чокырларны ремонтлаганда салкын, кайнар һәм коелган асфальт-бетон катнашмалар кулланыла. Кайнар асфальт-бетон катнашмасын ташу, республикада асфальт-бетон катнашмасының температура режимын саклауны тәэмин итү өчен, термосбункерлар ярдәмендә башкарыла, алар барлыгы 49 данә.
Яз башыннан барлык төр асфальт-бетон катнашмаларын кулланып, чокырларны ремонтлау 26 685 кв. м. башкарылган. Төбәк юлларында чокырларны ремонтлау өчен барлыгы 535 кеше, 245 берәмлек техника җәлеп ителгән.
Чокырларны ремонтлау региональ әһәмияттәге гомуми файдаланудагы автомобиль юлларын карап тотуга бүлеп бирелгән акчалар исәбеннән башкарыла. "Безнең подряд оешмалары белән өч еллык программаны тотуга төзелгән озак вакытлы контрактлар бар. Тотуга бүлеп бирелгән акчалар кысаларында әлеге төр эшләр башкарыла", - дип аңлатты Зөлфәт Ханмурзин.
Шунысын да билгеләп үтәргә кирәк, «Главтатдортранс» ДКУ оператив идарәсендә 13 790 км гомуми файдаланудагы төбәк әһәмиятендәге автомобиль юллары бар, шуларның 11 825 км асфальт-бетон өслекле, 98 км цемент-бетон өслекле, 1 350 км күчеш тибындагы өслекле, 515 км грунт юллар. Төбәк юлларында чокырларны ремонтлауның гомуми ихтыяҗы якынча 300 000 кв. м тәшкил итә.