Түбән Новгород-Казан электричкасының юлда йөрү вакыты кыскарды
Горький тимер юлы Түбән Новгород – Казан төбәкара электропоезд өчен юл вакытын кыскарткан. Әйтик, 2025 елның 3 февраленнән состав ахыргы станциягә кадәр 5 сәгать 55 минут барачак. Бу әлеге маршрутны эшләтеп җибәрү вакытына караганда 25 минутка тизрәк.
Электричка көн саен йөрүен дәвам итәчәк. Түбән Новгородтан ул 05:10 һәм 16:08 сәгатьтә китәчәк, Татарстан башкаласына 11:05 һәм 22:03 сәгатьтә киләчәк. Казаннан поезд 05:25 һәм 15:54 сәгатьтә китәчәк, Идел буе башкаласына 11:20 һәм 21:49 сәгатьтә киләчәк.
Юлда Арзамас-2, Перевозская, Сергач, Пильна, Княжиха, Шумерля, Вурнара, Канаш, Зөя һәм Яшел Үзән станцияләрендә тукталышлар каралган.
Билгеләп үтәргә кирәк, 2025 елның гыйнварында Горький магистрале әлеге маршрутта ЭП3Д сериясенең яңа буын электропоездын эшләтеп җибәрде. Состав салон эчендә һәм түбәдә видеокүзәтү камералары белән җиһазландырылган, бу барлык заманча транспорт куркынычсызлыгы таләпләренә туры килә. Түбән платформага чыгуны җиңеләйтә торган өстәмә кузгалмалы баскыч бар.
Вагоннар яңа эргономик креслолар, сыйдырышлы багаж киштәләре, велосипедлар ташу урыннары, һаваны зарарсызландыручы климат системалары белән җиһазландырылган. Беренче һәм соңгы вагон тамбурларында аз хәрәкәтләнүче гражданнарны утырту һәм төшереп җибәрү өчен махсус электр күтәргечләре каралган.
Өстәп әйтик, Түбән Новгород – Казан төбәкара электропоезды 2024 елда 400 мең пассажир ташыган, бу 2023 ел белән чагыштырганда 17% ка күбрәк.