Татарстанның таксида иң яхшы йөртүче исеменә Луиза Бәдриева өченче тапкыр лаек булды
Татарстанда «Россиядә иң яхшы такси йөртүче-2021» IV Бөтенроссия конкурсының төбәк этабы узды. Машина йөртүчеләр барлык таләпләргә дә туры килде – таксопаркта яки шәхси эшмәкәрдә эшкә урнашу, җиңел таксида пассажирлар йөртү һәм багаж ташу буенча эшчәнлекне тормышка ашыру өчен рөхсәт булу, шулай ук 3 ел машина йөртү стажы һәм ел дәвамында юл хәрәкәте кагыйдәләрен тупас бозу очраклары булмау.
Һөнәри осталык конкурсының региональ этабын оештыручылар - РФ Транспорт министрлыгы, Россия Эчке эшләр министрлыгының юл хәрәкәте иминлеген тәэмин итү буенча баш идарәсе һәм РФ Дәүләт Думасының Транспорт һәм төзелеш комитеты ярдәмендә Таксины үстерү буенча Иҗтимагый Совет.
Төбәк этабы өч турда узды. Судьялар машина йөртүчеләрнең һөнәри осталыгын һәм теоретик белемнәрен, шул исәптән төбәк тарихы, юл хәрәкәте кагыйдәләрен, юл-транспорт һәлакәтләрендә зыян күрүчеләргә беренче ярдәм күрсәтү нигезләрен, автомобиль төзелеше һәм таксида куркынычсыз шартлар тәэмин итү нигезләрен бәяләделәр.
Автодромда катнашучылар тиз йөрешле маневрлау осталыкларын күрсәттеләр һәм йөрүнең салмаклыгына күнегүләр ясадылар. Быел ике яңа сынау – «Бордюр» һәм «Чокыр» барлыкка килде.
Оештыру комитеты беренче тапкыр пассажирларны иң яхшысын сайлап алуда җәлеп итәргә һәм QR-код ярдәмендә онлайн-тавыш бирү үткәрергә карар кылды. Пассажирлар өчен онлайн-тавыш бирү вакыты QR-код алганнан соң ике ай.
Конкурс нәтиҗәләре буенча Луиза Бәдриева җиңүче дип танылды (93 балл). Икенче урында Ринат Хәйруллин (86 балл) һәм өченче урында Таһир Парпиев (79 балл).
Җиңүчеләргә 15 000 сум, 10 000 сум һәм 5 000 сум күләмендә акчалата бүләкләр тапшырылды. Луиза Бәдриева Федераль этапта чыгыш ясаячак, анда ул Татарстанны тәкъдим итәчәк (трансфер һәм финал уздыру вакытында яшәү өчен оештыру комитеты түләячәк).
Исегезгә төшерәбез, Луиза Бәдриева өченче ел рәттән төбәк этабында җиңүче булды. 2019 елда Луиза «Россиядә иң яхшы такси йөртүче» конкурсының федераль этабында җиңү яулады, 2020 елда бронза медаль иясе булды. Руль артында катнашучы инде 25 елдан артык, һәм шуларның 13е Луиза таксида эшли.