КДАТУда автомобиль юллары төзелеше куркынычсызлыгы буенча курслар ачылды
КДАТУ Транспорт корылмалары институтында Татарстанның юл-төзелеш оешмаларының инженер-техник хезмәткәрләренең квалификациясен күтәрү курслары ачылды. Курслар «Автомобиль юллары һәм аэродромнар төзелеше иминлеге һәм аларның сыйфаты» һәм «Автомобиль юлларын урнаштыру һәм аеруча куркыныч, техник яктан катлаулы һәм уникаль объектларда төзелеш һәм эксплуатацияләүнең перспектив технологияләре» темаларына оештырылган.
Курсларны ачуда Татарстан Республикасының транспорт һәм юл хуҗалыгы министры урынбасары Артем Чукин, КДАТУның фәнни-тикшеренү эшләре буенча проректоры, автомобиль юллары, күперләр һәм тоннельләр кафедрасы мөдире Евгений Вдовин, Транспорт корылмалары институты директоры Алексей Фомин һәм башкалар катнашты.
Үзенең сәламләү сүзендә Артем Чукин кызыклы һәм эчтәлекле программаны билгеләп үтте һәм дәресләрдән соң оештыручыларга түгәрәк өстәл уздырырга тәкъдим итте.
Татарстанда зур күләмдә юл төзелеше башкарыла, «Имин һәм сыйфатлы автомобиль юллары» илкүләм проекты тормышка ашырыла. Шуңа күрә юллар төзелеше куркынычсызлыгы һәм сыйфаты мәсьәләләре актуаль булып тора.
Курсларның рәсми ачылышы алдыннан катнашучылар өчен КДАТУның «Юллар/Roads», «Технологияләр/Technology», «Ныклык/Strength» фәнни-белем бирү үзәкләренә экскурсияләр оештырылды.