Татарстанда автомобиль транспортының йөк әйләнеше беренче яртыеллыкта 2,1% ка артты
Якынча мәгълүматларга караганда, автомобиль транспортының йөк әйләнеше 2020 елның I яртыеллыгында узган елның шул ук чоры белән чагыштырганда 2,1% ка арткан. Бу хакта ТР Транспорт һәм юл хуҗалыгы министры урынбасары Андрей Егоров агымдагы елның 1 яртыеллыгында республиканың транспорт тармагы эшчәнлегенең төп нәтиҗәләренә багышланган коллегия барышында хәбәр итте. Санитар-эпидемиологик шартларга карамастан, ташу күләмнәренең артуы гражданнарның сатып алу активлыгы югары һәм беренче чиратта кирәк булган товарларга ихтыяҗ зур булуга, шулай ук үз-үзеңне изоляцияләү чорында интернет-кибетләрнең популярлыгы артуга бәйле.
Пассажирлар йөртүгә килгәндә, вакытлыча чикләүләр кертү шартларында, хисап чорында республиканың автотранспорт предприятиеләре узган елның шул ук чоры белән чагыштырганда 32% ка кимрәк пассажирлар ташыган. Муниципалитетлар арасындагы маршрутларга хезмәт күрсәтүче транспорт предприятиеләре арасында 85%-ы, санитар-эпидемиологик хәл һәм кертелгән чикләүләр аркасында, 30 марттан үз эшчәнлеген туктатты.
12 майдан муниципалитетлар арасындагы даими маршрутларга чикләүләр бетерелгәннән соң барлык транспорт предприятиеләре үз эшләрен яңадан башлап җибәрделәр.