Татарстан шәһәр яны поездларының хәрәкәтен торгызуны дәвам итә
1 нче гыйнварга шәһәр яны тимер юл элемтәсендәге маршрут челтәре 113 маршрут тәшкил иткән, аларда 38 состав җәлеп ителгән. Агымдагы елда пассажирлар ташу күләмнәренең 30 процентка кимүе күзәтелә: беренче яртыеллыкта узган елның шул ук чоры белән чагыштырганда 945 мең пассажирга кимрәк ташылган. Бу саннарны Татарстан Республикасың транспорт һәм юл хуҗалыгы министры урынбасары Андрей Егоров Татарстан Республикасының транспорт һәм юл хуҗалыгы министрлыгы коллегиясенең чираттагы утырышында хәбәр итте. Сәбәбе - республика территориясендә коронавирус инфекциясе таралу куркынычын булдырмау өчен шәһәр яны пассажир поездлары хәрәкәтен кыскарту. Шулай итеп, 2020 елның 1 апреленнән 67 шәһәр яны пассажир поезды вакытлыча туктатылды. Иртәнге һәм кичке сәгатьләрдә йөрүче поездлар, шул исәптән субъектлар арасында, искәрмә булып тора. Алар предприятие һәм оешма хезмәткәрләренең чикләүләр чорында үз эшчәнлекләрен дәвам иткән кешеләрне йөртүне тәэмин иттеләр.
Шуңа да карамастан, А. Егоров сүзләренә караганда, республикада 1 майдан гамәлдән чыгарылган поездлар хәрәкәте акрынлап торгызыла башлаган һәм пассажирлар еш файдаланган маршрутларда составның артуы күзәтелә башлаган. Хәзерге вакытта чикләүләр гамәлдән чыкканчыга кадәр 113 поездның 101е йөри. Татарстан территориясендә шәһәр яны тимер юл транспортында пассажирлар йөртү операторы - «Содружество» пассажир компаниясе.