Татарстанда М12 Мәскәү — Казан трассасын дәвам итү өчен юл төзү мәсьәләсе карала
Татарстанда «Европа — Көнбатыш Кытай» халыкара транспорт маршруты составында М12 Мәскәү — Казан тиз йөрешле трассасын дәвам итү өчен автомобиль юлын төзү мәсьәләсе карала. Сүз Шәле - Баулы автомагистрален төзү турында бара, аңа булачак М12 трассасы чыгачак.
Татарстанда төзелеп килүче Шәле (М7) — Баулы (М5) автомагистрале — 299 км озынлыктагы М12 Мәскәү-Казан тиз йөрешле трассасы маршрутының логик дәвамы булып тора. Ул илнең мөһим М7 „Волга“ һәм М5 „Урал“ автомагистралләрен турыдан-туры бәйләргә мөмкинлек бирәчәк, шуның белән төбәкнең транзит потенциалын нәтиҗәле кулланырга һәм Үзәк — Себер һәм Үзәк — Урта Азия маршрутлары буенча транспортның үткән юлын сизелерлек киметергә мөмкинлек бирәчәк.
Шәле-Баулы автомагистрале төзелеше түбәндәге участоклар белән алып барыла: 40 км озынлыкта Саескан Тавы — Шәле автоюлы, Саескан Тавы авылы янындагы Кама аша күпер, 145 км озынлыкта Алексеевск — Әлмәт һәм 100 км озынлыкта Әлмәт — Баулы юллары.
Әлеге проект буенча капиталь чыгымнарның гомуми күләме 39 млрд. сумнан артып китә, шул исәптән федераль бюджетта — 4,3 млрд. сум, республикада — 9,5 млрд. сум һәм 25,7 млрд. сум - хосусый инвестор акчасы каралган.
2011 елда Саескан Тавы — Шәле (М7) автомобиль юлының беренче этабы файдалануга тапшырылды. Төзелешнең икенче чиратына проект-смета документациясенә Баш дәүләт экспертизасының уңай бәяләмәсе алынды.
Кама аша күпер кичүенә килгәндә, беренче сафка кертелә торган комплекс 2002 елда, ә 2016 елда икенче эшләтеп җибәрү комплексы файдалануга тапшырылды. 2018 елда күпер Р-239 Казан - Оренбург автоюлы составында федераль милеккә тапшырылды.
Алексеевск — Әлмәт трассасы буенча шәхси инвестор җир өслеген төзү, инженерлык коммуникацияләрен үзгәртеп кору, ясалма корылмалар, күперләр, юл үткәргечләр төзү буенча эш алып бара.
Әлмәт — Баулы (М5) автомобиль юлы төзелеше бәясе 79,1 млрд. сум дип бәяләнә. Планнарны тормышка ашыру проектлауга һәм төзелешкә финанслау булгач башланачак.
Татарстан Россиянең эре индустриаль районы үзәгендә, Көнбатыш — Көнчыгыш һәм Европа — Көнбатыш Кытай транспорт коридорларына бару юлында урнашкан. Социаль-икътисади үсешнең югары потенциалы республиканы Мәскәү агломерациясе, Урал федераль округы һәм Казахстан белән тоташтыручы сыйфатлы, тиз йөрешле һәм куркынычсыз транспорт инфраструктурасы таләп итә.
Магистраль инфраструктураны Модернизацияләү һәм киңәйтү комплекслы планы нигезендә 2024 елга кадәр Идел аша күпер белән М12 Мәскәү - Казан тиз йөрешле трассасын төзү һәм киләчәктә М7 автомобиль юлы белән тоташтыру планлаштырыла.