Фәрит Хәнифов Теләче районы Советы утырышында катнашты
Бүген Татарстан Республикасы Теләче муниципаль районы Советының беренче оештыру утырышы узды. Утырышта Татарстан Республикасы транспорт һәм юл хуҗалыгы министры Фәрит Хәнифов, Татарстан Республикасы спорт министрының беренче урынбасары Хәлил Шәйхетдинов, Теләче якташлык җәмгыяте рәисе Ирек Даутов, «Барс Медиа» ҖЧҖ директорлар советы рәисе Камил Гәрәев һәм башкалар катнашты.
Министр үз чыгышында Рөстәм Миңнеханов исеменнән Республика рәисен һәм җирле үзидарәнең вәкиллекле органнары депутатларын сайлауларны уңышлы уздырган өчен рәхмәт белдерде. "Сайлау нәтиҗәләре буенча республика сайлаучыларының 75,85% тавыш бирүдә катнашты. Барлык 911 җирлектә җирле үзидарә органнарына депутатлар сайлаулар узды, муниципаль берәмлекләрнең вәкиллекле органнарыннан 7 517 депутат сайланды", - дип хәбәр итте Фәрит Хәнифов.
Министр депутатларга муниципаль берәмлек башлыгы вазифасына кандидатураны тәкъдим итте. Фәрит Хәнифов кандидатның һөнәри сыйфатларын һәм потенциалын югары бәяләде, аның район халкы файдасына актив эшләргә әзер булуын ассызыклады.
Ачык тавыш бирү йомгаклары буенча район Советы депутатлары бертавыштан Айрат Фәтхуллинны район башлыгы итеп сайладылар. Ул ант итте һәм рәсми рәвештә үз вазифасына кереште.