Юбилей контейнер поезды Ерак Көнчыгыштан Горький магистраленә килде
«Феско Казан Шатл» даими сервисы кысаларында йөрүче йөзенче контейнер поезды Ерак Көнчыгыштан Горький тимер юлының Тихорецкая станциясенең терминал-логистика үзәгенә килде. Проект Татарстан Республикасы Хөкүмәте һәм FESCO транспорт төркеме белән берлектә «Россия тимер юллары» ААҖ тарафыннан гамәлгә ашырыла.
Состав Азия - Тын Океан төбәге илләреннән авырлыгы 2 мең тоннага якын булган 126 контейнер товар китерде.
Владивосток - Казан маршруты АТР илләреннән Россиягә диңгез һәм тимер юл транспорты катнашында ташуның интермодаль схемасында мөһим звено булып тора. Әлеге сервисны Горький магистралендә эшләтеп җибәргәндә, составлар ике атнага бер тапкыр җибәрелә иде. Даими статус алганнан соң, бу юнәлештә контейнер ташу ике тапкырга тизләнде. Махсус формалаштырылган график ярдәмендә поездлар хәзер маршрутны 10-11 тәүлектә уза. Хәзерге вакытта Казанга шундый 6 состав килә.
2024 елның языннан маршрут боҗраланган иде. Татарстаннан Приморье краена республика предприятиеләре продукциясе – полиэтилен, сәнәгать коксы, изоляция материаллары, агач-мебель әйберләре, дивар панельләре, үсемлек мае һәм башкалар җибәрелә башлады.
Исегезгә төшерәбез, агымдагы елның язында «TransRussia 2025» Халыкара күргәзмәсендә имзаланган «FESCO» компаниясе белән килешү кысаларында Горький тимер юлы 2025 елның июнендә Түбән Новгород өлкәсе предприятиеләре продукциясе белән җыелма контейнер поездын Хабаровск краена яңа маршрут буенча җибәрде.