ТНФ-2025 кысаларында «Юл төзелешендә нефть химиясе продукциясен куллануны киңәйтү» дигән түгәрәк өстәл узды
«Казан Экспо» үзәгендә Татарстан нефть-газ химиясе форумы-2025 кысаларында юл төзелешендә нефть химиясе продукциясен куллануны киңәйтү мәсьәләләре буенча утырыш узды. Утырышның модераторы ТР транспорт һәм юл хуҗалыгы министры Фәрит Хәнифов булды. Түгәрәк өстәл эшендә Татарстан Республикасы Премьер-министры Алексей Песошин, Татарстан Республикасы Премьер-министры урынбасары - Татарстан Республикасы сәнәгать һәм сәүдә министры Олег Коробченко, «Татнефтехиминвест-холдинг» ААҖ генераль директоры Рафинат Яруллин, Татарстан Республикасының нефть-газ химиясе, юл предприятиеләре, уку йортлары җитәкчеләре һәм вәкилләре катнашты.
Катнашучылар юл төзелешендә материаллар һәм технологияләр куллану турында фикер алыштылар.
«Автодор» дәүләт компаниясе объектларында нефть химиясе продукциясен куллану тәҗрибәсе турында «Автодор» дәүләт компаниясенең техник сәясәт һәм инновацион технологияләр идарәсе башлыгы урынбасары Сергей Ильин сөйләде.
КДАТУ вәкилләре югары уку йортының фәнни-инновацион эшләнмәләрен гамәлгә кертү турында хәбәр иттеләр. 2013 елдан республиканың 10 районында җирле модификацияләнгән материаллар кулланып 40 эксперименталь участок төзелде. Эшкәртү һәм модификацияләү исәбенә башлангыч материалның төрле физик-механик үзлекләре (ныклыгы, салкынга чыдамлыгы һ.б.) яхшыра.
Киңәшмә барышында шулай ук төрле компанияләр җирне ныгыту технологиясе, полимербетоннан эшләнгән әйберләр, герметизацияләү материаллары һәм башка проектлар буенча үз эшләнмәләрен тәкъдим иттеләр.
Татарстан Премьер-министры юл-төзелеш тармагында алдынгы технологияләрне гамәлгә кертүнең мөһимлегенә басым ясады. "Сыйфатлы һәм имин юл челтәрен үстерү безнең өстенлегебез булып кала, һәм фән бу процесста төп рольне уйный. Безгә күбрәк инновацион чишелешләр кирәк», — дип белдерде Алексей Песошин.