Татарстанда навигация башыннан 78 меңнән артык пассажир ташылган
Татарстан Республикасында навигация башыннан 78 мең 864 пассажир йөртелгән. Шулардан 40639 пассажир даими социаль рейсларда, 38225 пассажир туристик маршрутларда йөртелгән. 2024 елның шул ук чорында 56 меңнән артык пассажир ташылган.
Исегезгә төшерәбез, Татарстанда навигация быел 25 апрельдә старт алды. Пассажирларны елга аша йөртү 10 социаль әһәмиятле маршрут буенча башкарыла. Социаль маршрутларда даими рәвештә пассажирлар йөртүдә 10 теплоход, коммерцияле пассажирлар йөртүдә 3 теплоход җәлеп ителгән.
Шунысын да билгеләп үтәргә кирәк, «Павел Миронов» икепалублы теплоходы озак вакытлы тәнәфестән соң круиз рейсларын яңартты, бу республикада елга туризмын үстерү өчен мөһим вакыйгаларның берсе булып тора. Теплоход Түбән Новгородка, Уфага һәм Самарага рейслар башкарган инде.