Татарстанда Җиңү көненә җәмәгать транспортын брендлау проекты үткәрелде
Татарстан Республикасы муниципаль берәмлекләрендә Бөек Ватан сугышында Җиңүнең 80 еллыгын бәйрәм итүгә җәмәгать транспортын масштаблы брендлау буенча эш башкарылды. Хәрәкәт составын рәсмиләштерү метрода, автобусларда, троллейбусларда, трамвайларда һәм җәмәгать транспорты тукталышларында башкарылган.
Брендлау эше ТР транспорт һәм юл хуҗалыгы министрлыгы тарафыннан республиканың муниципаль берәмлекләре белән берлектә оештырылды. Татарстанда барлыгы 300дән артык автобус, 140 тукталыш пункты, 20дән артык трамвай, троллейбус брендланган. Шулай ук автобус эчендәге медиаэкраннарда Җиңү көненә багышланган видеороликлар трансляцияләнәчәк. Шунысын да билгеләп үтәргә кирәк, дизайнның якты элементлары сугыш еллары вакыйгалары, фронтовик геройлар һәм ил тыныч күк йөзе өчен түләгән бәя турында визуаль искә төшерү булачак.
Әлеге проект визуаль образлар аша шәһәр халкына тарихи хәтерне саклауның мөһимлеген җиткерүгә юнәлдерелгән. Яшьләрне патриотик тәрбияләүгә, ил өчен горурлык хисе һәм ата-бабаларыбызның батырлыгына хөрмәт тәрбияләүгә аерым басым ясалды.
"Бөек Җиңү көне - илнең төп бәйрәме, безнең барлык муниципалитетларда да бәйрәм рухы сизелергә тиеш. Мондый инициативалар шәһәр мохитен бизәп кенә калмый, ә кыйммәтләрне буыннан-буынга тапшыруда мөһим элемент булып тора, тарихка аңлы һәм җаваплы мөнәсәбәт өчен нигез булдыра», - дип билгеләп үтте ТР транспорт һәм юл хуҗалыгы министры урынбасары Айрат Садыйков.