Габдулла Тукай исемендәге «Казан» Халыкара аэропорты «Россия канатлары» Милли авиация премиясендә 2024 елның иң яхшы аэропорты дип игълан ителде
2024 елдагы эш нәтиҗәләре буенча Габдулла Тукай исемендәге «Казан» Халыкара аэропорты «Ел аэропорты» номинациясендә Евгений Чибирев исемендәге «Россия канатлары» Илкүләм авиация премиясенә ия булды (2 төркем – пассажирлар агымы 3 миллионнан 14 миллионга кадәр). Бүләкләү тантанасы бүген Мәскәүдә узды.
«Казан» аэропорты пассажирларның уңайлылыгына һәм куркынычсызлыгына зур игътибар бирә, залларда булуны мөмкин кадәр уңайлырак итәргә омтыла. Коллективның хезмәте югары бәяләнүенә без бик шат. Димәк, без кунакчыллыкны, сыйфатлы сервисны, очышлар куркынычсызлыгын үстерүдә, шулай ук һава аланының уңай абруен ныгытуда дөрес юлда. Әмма камиллеккә чик юк, шуңа күрә хәзер пассажирларга тагын да уңайлырак булсын өчен өченче терминал концепциясен кабул итү буенча эш алып барабыз. «Казан» аэропортын җиңүе белән котлыйбыз һәм киләчәктә дә уңышлар телибез», - дип шәрехләде ТР транспорт һәм юл хуҗалыгы министры Фәрит Хәнифов.
«Казан» Халыкара аэропорты АҖ генераль директоры Сергей Романцов билгеләп үткәнчә, «Казан» аэропорты ирешкән уңышлар һава гаване коллективы эше нәтиҗәсе:«бу көчле, профессиональ һәм җаваплы команда. Без эксперт бергәлегенә, партнерларга, тармак массакүләм мәгълүмат чаралары вәкилләренә һәм пассажирларга безгә югары бәя биргәннәре һәм күрсәткәннәре өчен рәхмәт белдерәбез. 3-14 миллион хезмәт күрсәтелгән пассажирлар кебек көндәшлек категориясендә «Россия канатлары» милли премиясе – Россия гражданлык авиациясе файдасына аэропортны алга таба үстерү өчен җитди стимул».
2024 елда «Казан» аэропортында Казанда БРИКС саммитын уңышлы уздырырга мөмкинлек биргән масштаблы проектлар гамәлгә ашырылды: пассажирлар перроны мәйданы 2 мәртәбәгә арттырылды, яңа инфраструктура объектлары төзелде, өстәмә җиһазлар сатып алынды һәм урнаштырылды.
Аэропорт 2024 елда рекордлы сандагы пассажирларга хезмәт күрсәтте, яңа чит ил партнерлары белән уңышлы хезмәттәшлек башланды, Татарстан Республикасы һәм Россия Федерациясе өчен стратегик әһәмияткә ия авиамаршрутлар ачылды.