Казан тимер юл вокзалында балалар өчен квест-экскурсияләр узды
Горький тимер юлы Казан шәһәре мәктәпләре укучылары өчен квест-экскурсияләр үткәрде. Чаралар транспорт полициясе белән берлектә поездлар хәрәкәте зонасында имгәнүләрне булдырмау максатында оештырылган.
Укучыларга тимер юл вокзалы эше һәм транспорт инфраструктурасында булу кагыйдәләре турында сөйләделәр. Моннан тыш, балалар үзләрен тренажер комплексында машинист ролендә сынап карый алдылар. Шулай итеп, алар үз-үзләрен тоту кагыйдәләре турындагы белемнәрен ныгытып кына калмадылар, ә шәхси тәҗрибәләрендә составның ашыгыч тукталыш кулланганда тормоз юлының 1 км га кадәр арта алуына инандылар.
Акциядә катнашучылар компания хезмәткәрләреннән куркынычсызлык кагыйдәләре турында мәгълүмат бирә торган корпоратив сувенирлар һәм буклетлар алдылар.
Горький магистрале бәхетсезлек очракларын кисәтүгә һәм балаларны тимер юлда үз-үзләрен куркынычсыз тотарга өйрәтүгә зур игътибар бирә. Уку елы дәвамында һәм каникул көннәрендә Горький тимер юллары хезмәткәрләре мәгариф һәм сәламәтләндерү учреждениеләрендә профилактика дәресләре үткәрә, «Россия тимер юллары» ААҖ предприятиеләренә экскурсияләр оештыра.
Өстәп әйтик, тимер юлчылар транспорт полициясе белән берлектә юл аша рөхсәтсез узу урыннарында даими рәвештә профилактик рейдлар уздыра.