Бүген «Казан» Халыкара аэропорты «Россиянең һава капкасы» XI Милли премиясенә ия булды
2024 елдагы эш нәтиҗәләре буенча Габдулла Тукай исемендәге «Казан» Халыкара аэропорты «Елына 2-6 млн пассажир категориясендә 2024 елның иң яхшы аэропорты» номинациясендә «Россиянең һава капкасы» XI Милли премиясенә ия булды.
Бүләкләү тантанасы Мәскәүдә Nais граждан авиациясе инфраструктурасы милли күргәзмәсе кысаларында узды. Бүләкне Россия Федерациясе Герое Дамир Йосыпов тапшырды.
«Татарстан Республикасының төп һава аланы зур потенциалга ия күп функцияле аэропорт комплексы булып тора. 2024 елда БРИКС саммитына самолетларны бозлавыкка каршы эшкәртү комплексы булган яңа перрон файдалануга тапшырылды. Хәзерге вакытта аэропорт берьюлы 33 киң фюзеляжлы борт кабул итәргә сәләтле. Бүген өченче терминал концепциясен кабул итү буенча эшләр алып барыла. Бу чараларның барысы да пассажирлар өчен уңайлы шартлар тудырырга мөмкинлек бирәчәк. «Казан» аэропортын шундый югары бүләк алуы белән котлыйбыз һәм киләчәктә дә уңышлар телибез», - дип билгеләп үтте ТР транспорт һәм юл хуҗалыгы министры Фәрит Хәнифов.
«Россиянең һава капкасы» премиясе - ул безнең коллективның иң югары бүләге һәм казанышы. Россиянең иң яхшы аэропорты исеме аэропортка эксперт бергәлеге, партнерлары һәм пассажирлары тарафыннан бирелгән югары бәя турында сөйли. Узган ел аэропортта Казанда БРИКС саммитын уңышлы уздырырга мөмкинлек биргән масштаблы проектлар гамәлгә ашырылды: пассажирлар перроны 2 мәртәбәгә зурайтылды, яңа инфраструктура объектлары төзелде, өстәмә җиһазлар сатып алынды һәм урнаштырылды. Шулай ук 2024 елда хезмәт күрсәтелгән пассажирларның рекордлы санын, яңа чит ил партнерларының килүен һәм Татарстан Республикасы һәм Россия Федерациясе өчен стратегик әһәмияткә ия авиамаршрутларның ачылуын билгеләп үтәбез», - диде «Казан Халыкара аэропорты» АҖ генераль директоры Сергей Романцов. Ул шулай ук мондый дәрәҗәдәге казанышлар коллективтан хезмәт сөючәнлек, профессиональлек, энтузиазм соравын, бөтен команданың бердәм булып хезмәт итүен билгеләп үтте һәм экспертларга «Казан» аэропорты эшенә югары бәя биргәннәре өчен рәхмәтен белдерде.