Казанда Балалар тимер юлында тәрбияләнүчеләрне яшь тимер юлчыларга багышладылар
Беренче елын укучы балалар өчен яшь тимер юлчылыкка багышлау чарасы Казандагы балалар тимер юлында уздырылды. Беренче таныклыкларын 250 укучы алачак.
Багышлау кысаларында беренче курс студентларының һәр төркеме «Таныклык эзләү» интерактив квесты уза. Балалар биремнәрне үтиләр, ребуслар чишәләр, командаларының бердәмлеген, зирәклеген һәм тапкырлыгын күрсәтәләр. Төркемнәрнең берсе өчен чара Юдино тимер юл узелының яңа хезмәт һәм дан музеенда оештырылды. Балаларга мавыктыргыч экскурсия вакытында музей экспонатлары белән танышу мөмкинлеге бирелде.
Өстәп әйтик, яңа уку елында 16 яшькә җиткән тимер юл тәрбияләнүчеләре өчен машинист ярдәмчесе һөнәри әзерлек курслары старт алды. Укулар Горький һөнәри квалификацияләр уку үзәгенең Казан бүлекчәсе педагоглары тарафыннан үткәрелә. Ул тәмамлангач, 9 яшь тимер юлчы Балалар тимер юлында белем алу турында таныклык кына түгел, ә «тепловоз машинисты ярдәмчесе» һөнәренә ия булу турында таныклык та алачак.
Исегезгә төшерәбез, 2024 елның җәендә Казанда Балалар тимер юлы 36 меңнән артык пассажирны йөрткән. Бу узган елның шул ук чоры белән чагыштырганда 35% ка күбрәк. 600дән артык яшь тимер юлчы практик дәресләр уздырды, шуларның 88е – Кизнер, Ижевск, Канаш, Алатырь, Яшел Үзән линия станцияләреннән. Поезд практикасын үтү барышында тимер юлда тәрбияләнүчеләр машинист, поезд башлыгы, проводник, контролер-ревизор һәм башка тимер юл һөнәрләре белгечләре вазыйфаларын башкардылар.
Укуны тәмамлагач, яшь тимер юлчыга таныклык бирәләр. Быел 49 чыгарылыш укучысының 31е һөнәри белем алуларын дәвам итеп, Казан тимер юл техникумына (ПривГУПС филиалы) укырга керделәр.