Татарстанда Идел буйлап пассажир навигациясен ачу тантанасы булды
Бүген, 28 апрельдә, Татарстанда Идел буйлап пассажир навигациясен ачтылар. Казанның Елга портында узган чара Россия һәм Татарстан гимннарыннан башланды. Аннары тантаналы марш белән Советлар Союзы Герое М.П. Девятаев исемендәге- «ВГУВТ» югары белем бирү федераль дәүләт бюджет учреждениесенең Казан филиалы диңгез һәм елга флоты институты курсантлары үтте.
«Навигацияне ачу теләсә нинди речник өчен бик мөһим вакыйга. Бу һәрвакыт дулкынландыргыч дата. Без вакытны юкка гына югалтмадык - кыска вакыт эчендә ремонт һәм кадрлар эшләрен башкарырга тырыштык», - дип сәламләде җыелганнарны «ТР Флоты» АҖ генераль директоры Роман Лизалин.
Аның сүзләренчә, компания быел су транспортына билетларны онлайн-сатуны башлап җибәрү буенча эш алып барган. «Бу, әлбәттә, хезмәтләрнең сыйфатын күтәрәчәк. Быел без яңа регионара тиз йөрү программасына керәбез. Узган ел аны сынап карадылар, ә быел мондый ташулар даими нигездә булачак», – диде спикер.
Лизалин өстәп әйткәнчә, «РТ Флоты» «Аэрофлот» компаниясе белән берлектә «иң югары стандарт» буенча су транспорты өчен бортпроводниклар әзерләү буенча эш алып барган. «Бу да хезмәтне, хезмәт күрсәтү сыйфатын яхшырту өчен ярдәм булачак», – дип билгеләп үтте ул.
Моннан тыш, компания өчен пассажирлар йөртү куркынычсызлыгы өстенлекле булып кала. «Бу өлештә транспорт куркынычсызлыгы һәм корабларның техник торышы, экипаж әзерләү буенча эш башкарылды. Боларның барысы да без татарстанлыларны һәм республика кунакларын елга транспорты белән тәэмин итә алсын өчен кирәк. Ләкин бу Татарстан җитәкчелеге ярдәменнән башка берни дә булмас иде», - дип белдерде спикер.
Лизалин елга транспортында зур потенциал барлыгына ышана. «Барыбызны да «ак аккошларыбызны» кулланырга чакырабыз. Хәерле юл! Тулы алга!» – дип йомгаклады ул.
Навигацияне ачу тантанасында Татарстан Республикасы Транспорт һәм юл хуҗалыгы министры урынбасары вазыйфаларын башкаручы Марат Хисаметдинов Татарстан Транспорт һәм юл хуҗалыгы министрлыгы башлыгы Фәрит Хәнифовның сәламләвен укыды.
«Быел шәһәр яны маршрутлары буенча пассажирлар йөртүне ТР Раиса Рөстәм Миңнеханов ярдәме белән төзелгән» Татарстан Республикасы Флоты» яңа суднолар компаниясе башкарачак», – дип билгеләп үтте министр.
Ул искә төшергәнчә, узган ел компания А.М. Горький исемендәге Яшел Үзән заводында төзелгән өч яңа судно, су асты канатындагы ике тизлекле судно – «Михаил Девятаев» һәм «Муса Җәлил», шулай ук «Капитан Гусев»теплоходы алган. «Бу Татарстанда елга транспорты үсешенә уңай этәргеч бирер, республиканы су юллары буенча күрше төбәкләр белән бәйләргә мөмкинлек бирер дип өметләнәм», – диелә Хәнифов сәламләү текстында.