Яр Чаллыга 36 яңа «НЕФАЗ» автобусы килгән
Шәһәр мэры Наил Мәһдиев «Горкоммунхоз» МУП җитәкчесе Альвир Аглуллинга зур сыйдырышлы яңа автобуслар файдалануга сертификат тапшырды. Бүген, 15 мартта, тантаналы чара Прибрежный паркы мәйданында узды, анда «НЕФАЗ»маркалы автобуслар сафка тезелде. Чарада шулай ук «КАМАЗ» ААҖ генераль директоры Сергей Когогин катнашты.
Чаллы шәһәре Башкарма комитетының, Татарстан Республикасы Хөкүмәтенең уртак эше һәм Россия Федерациясе ярдәме белән муниципаль предприятие автопаркы тагын 36 яңа автобус белән тулыланды.
«Бүген шәһәребез тормышында үзенчәлекле көн, мөһим вакыйга-җәмәгать транспорты маршрутларына 36 яңа автобус чыгачак. Без муниципалитетларда һәм шәһәрләрдә җәмәгать транспортын яңарту буенча зур программа башлап җибәргән илебез җитәкчелегенә рәхмәтле. Чаллы бу программаларда, лизинг программасы буенча, махсус казна кредиты программасы буенча эшли. Быел 90 автобус алырга ниятлибез. Беренче партия безнең ташучыга тапшырылды, 10 автобус маршрутлар буенча йөри. Махсус казна кредиты буенча 36 автобусның икенче өлеше килә, ул шәһәр ташучысына тапшырыла. 2-3 көннән соң маршрутларга чыгачаклар. Без Татарстан Республикасы Рәисенә ярдәмнәре өчен, КАМАЗ командасына һәм шәхсән Сергей Анатольевич Когогинга контрактны үтәгәне, автобусларның югары сыйфаты өчен рәхмәтле», – дип билгеләп үтте шәһәр мэры Наил Мәһдиев.
Татарстан Республикасы Россия Федерациясе Хөкүмәте белән берлектә җәмәгать транспортының хәрәкәт итүче составын яңарту чараларын гамәлгә ашыра. Шуның аркасында Яр Чаллыда яңа автобуслар барлыкка килә.
«Безнең компаниягә шәһәребездә безнең продукциянең йөрүе шатлык китерә. Безнең шәһәр үсә, мәйданы арта, яңа урамнар барлыкка килә. Транспорт алдында җитди бурычлар тора. зур уңайлы автобусларга күчү-дөрес карар», - диде «КАМАЗ» ААҖ генераль директоры Сергей Когогин.
Исегезгә төшерәбез, узган айда Рөстәм Миңнеханов «Горкоммунхоз» МУП хезмәт күрсәтә торган шәһәр маршрутлары буенча йөрүче НЕФАЗ маркалы 10 автобус тапшырды.
Элегрәк шәһәр җитәкчелеге муниципаль бюджеттан зур сыйдырышлы 45 яңа автобус сатып алган иде.