Татарстанда илкүләм проект кысаларында Зур Нөркәй-Кадрәк автомобиль юлының 1,7 км озынлыктагы участогы ремонтланды
Татарстанның Минзәлә районында Зур Нөркәй-Кадрәк автомобиль юлында 19,5 км дан 21,2 км га кадәр участокта ремонт эшләре тәмамланган. Участок ремонт программасына «Имин һәм сыйфатлы автомобиль юллары» илкүләм проекты кысаларында кертелгән.
Юл хәрәкәтнең 2 полосасы белән 4 техник категория нормативы буенча проектланган, машиналар йөрү өлешенең киңлеге 7 м тәшкил итә. Ремонт барышында һәр яктан 1,5 м юл кырыйлары вак таш белән ныгытылган, металлдан 96 метр озынлыктагы барьер киртәләре урнаштырылган һәм юл тамгалары төшерелгән. Финанслау күләме 19 миллион сумнан артык тәшкил иткән.
Эшләрнең генераль подрядчысы - Татарстанның әйдәп баручы юл оешмаларының берсе «Татавтодор» АҖ.
Исегезгә төшерәбез, Татарстанда 2019 елда «Имин һәм сыйфатлы автомобиль юллары» илкүләм проекты буенча төбәк челтәренең 108,3 км озынлыктагы 75 объекты ремонтланган.