Казанда илкүләм проект кысаларында Юдино-Залесный шоссесы ремонтлана
«Имин һәм сыйфатлы автомобиль юллары» илкүләм проекты кысаларында Казанда Юдино-Залесный шоссесы ремонтлана. Бу юл Юдино тимерьюлчылары бистәсендә яшәүчеләр өчен төп артерия булып тора һәм Залесная урамы белән торак массивны тоташтыра.
Ремонтлана торган юлның озынлыгы 5 км тәшкил итә, машиналар йөрү өлешенең киңлеге – 4-7 метр. Гомуми мәйданы 31 700 кв.м булган машиналар йөри торган өлешендә искесен салдырып, югары сыйфатлы ЩМА-20 асфальт-бетоннан яңа катлам җәеләчәк. Шулай ук гомуми мәйданы 1240 кв.м булган тротуарларны ремонтлау, борт ташларын алыштыру, 7 яктырту баганалары һәм 4 тукталыш павильоны урнаштыру каралган.
Хәзерге вакытта булган асфальт-бетон өслеген фрезерлау, өске катламын тигезләү эшләре башкарылды. Ремонтны тәмамлау срогы – 15 июльдә.
Эшләрнең подрядчысы - «Волга-Автодор» ҖЧҖ.
Юдино - Казанның Киров районы составындагы микрорайон һәм Аккош күле урман паркы зонасына тоташа. Тимерьюлчылар поселогы Гражданнар сугышы герое Ян Юдин хөрмәтенә аталган, 2018 елда үзенең 100 еллык юбилеен билгеләп үтте.