Татарстанның «ЮВТ АЭРО» авиакомпаниясе Бөгелмәдән Нарьян-Марга рейс ача

2019 елның 3 июне, дүшәмбе

2019 елның җәйге сезонында «ЮВТ АЭРО» авиакомпаниясе туры рейс белән Ненец автономияле округын Татарстан Республикасы белән тоташтырачак.

3 июньнән авиакомпания Бөгелмә – Нарьян-Мар – Бөгелмә маршруты буенча яңа рейс башкара башлый. Рейс дүшәмбе көннәрендә 50 урынлы Bombardier CRJ-200 самолетларында башкарылачак. Җәдвәл буенча, борт Татарстаннан 14:10 оча, юл вакыты 2 сәгать 20 минут тәшкил итәчәк. Нарьян-Мардан Бөгелмәгә 17:30 сәгатьтә оча.

Билет бәясе, авиакомпания сайтында сатып алынган очракта, бер якка 5 590 сум тәшкил итә.

Исегезгә төшерәбез, «ЮВТ АЭРО» авиакомпаниясе Бөгелмә аэропортыннан Мәскәү, Нижневартовск, Сургут, Усинск, Ноябрьск һәм Яңа Уренгой шәһәрләренә рейслар башкара.