"Заказчылар" рәсми ташучыларның пассажирларын үзләренә җәлеп итәләр
Бүген Ространснадзор, ТР буенча ЭЭМ ЮХИДИ һәм ТР Транспорт һәм юл хуҗалыгы министрлыгы хезмәткәрләре Казанда заказлы ташучыларның пассажирларны санкцияләнмәгән озату урыннары буенча рейд үткәрделәр. Шахиди урамында, Вокзал алды мәйданында һәм Камал театры янында оештырылган стихияле автостанцияләр тикшерелде.
Урта Идел төбәкара дәүләт автомобиль юллары күзәтчелеге идарәсенең өлкән дәүләт инспекторы Алмаз Ярхамов сөйләвенчә, Татарстанда «заказлы» төр астында даими рәвештә пассажирлар йөртүне гамәлгә ашыручы ташучылар ачыкланган.
Шулай итеп, Йошкар-Ола – Казан - Йошкар-Ола маршруты буенча «Экспресс Тур» ҖЧҖ (Йошкар-Ола) компаниясе пассажирлар йөртүне оештырган. Казанда пассажирларны җыю һәм теркәү Шаһиди урамында. Йошкар-Олада автобуслар Ленин проспекты, 38 адресы буенча җәмәгать транспорты тукталышыннан китә. Йөрү өчен квитанцияләр тукталыш янындагы павильонда бирелә.
Яр Чаллы-Казан-Яр Чаллы маршруты буенча «Ак Барс Трансфер» ҖЧҖ (Яр Чаллы) заказчылар булып даими рәвештә пассажирлар йөртә. Элегрәк әлеге автотранспорт предприятиесе Татарстан Республикасы Транспорт һәм юл хуҗалыгы министрлыгы белән килешеп, әлеге маршрутка легаль хезмәт күрсәтте, пассажирларны утырту һәм төшерү автостанцияләр территориясендә уздырылды, һәм барлык транспорт чараларының маршрут карталары бар иде.
Аннары компания конкурс документларында бәян ителгән даими йөртүләргә карата таләпләрне игътибарсыз калдыра башлады, автовокзалга керүдән туктады. Шуңа күрә Татарстан Республикасы Транспорт һәм юл хуҗалыгы министрлыгының 2018 елның 26 гыйнварындагы 47 номерлы боерыгы белән «Ак Барс Трансфер» ҖЧҖнең Яр Чаллы-Казан-Чаллы маршруты буенча даими йөртүгә таныклыгы гамәлдән чыгарылды.
Ташучы пассажирларны вокзал яны мәйданыннан җыя башлый, аннары җәмәгать транспорты тукталышларыннан. Пассажирлар җыюны һәм утыртуны вокзал яны мәйданында, Космонавтлар урамында махсус хезмәткәрләр һәм диспетчерлык хезмәте координацияли.
«Заказчылар» транспорт куркынычсызлыгын тәэмин итми, даими автобус маршрутлары буенча легаль ташучылар белән тигезсез шартлар тудыралар һәм намуссыз конкурентлыкка китерәләр. Татарстанда хәзерге вакытта 42 транспорт предприятиесе рәсми рәвештә 149 муниципальара маршрутка хезмәт күрсәтә.
Бүген рейд нәтиҗәләре буенча «заказлы» төре белән даими рәвештә пассажирлар йөртүне гамәлгә ашыручы 2 транспорт компаниясенә карата Ространснадзор хезмәткәрләре административ эш кузгатты.