Фәрит Хәнифов: Казан агломерациясендә 63 км озынлыктагы түләүле очыш трассалары төзергә кирәк
Казан агломерациясендә гомуми озынлыгы 80,3 км тәшкил иткән түләүле дублер юлларны тоташтыручы түләүле очыш трассаларын һәм автомобиль юлларын төзү зарур. Бу хакта ТР Транспорт һәм юл хуҗалыгы министры Фәрит Хәнифов КДАТУ узган «ТР агломерацияләрен һәм транспорт инфраструктурасын үстерү» дип аталган фәнни-проект семинарында белдерде.
«Бүгенге көндә Россия Федерациясе Хөкүмәте кабул иткән агрессив үсеш стратегиясе 30 минутлык шәһәр стратегиясе турында сөйли. Ягъни түләүле очыш трассалары шәһәр агымыннан изоляцияләнергә тиеш, ә аларны тоташтыру шәһәрнең бер өлешеннән икенчесенә тоткарлыксыз барып җитәргә мөмкинлек бирәчәк.
Без 63 км озынлыктагы очыш трассалары төзергә һәм аларны тоташтыру өчен тагын 17,5 км төзергә тиеш», - диде ТР Транспорт министрлыгы башлыгы.
Министр искәрткәнчә, Татарстанда өч зур агломерация бар: Казан, Яр Чаллы һәм Әлмәт, алар өч сәнәгать зонасын формалаштыралар.
«Иң авыры - Казан. Ул Биектау, Яшел Үзән, Питрәч, Югары Ослан һәм Лаеш районнарының боҗра эчендә урнашкан. Казанга керүче һәм аннна чыгучы 10 юл өйрәнелде, аларның бишесе бүген транспорт коридорларына-дублерларга мохтаҗ», - дип билгеләп үтте ул.
Министр сүзләренә караганда, Казанның үзенчәлеге шунда: юллар мәйданының шәһәр мәйданына нисбәте минималь, ягъни 1% тан аз гына артык. «Казанның урам-юл челтәренең тыгызлыгы башка шәһәрләргә караганда берничә тапкырга кимрәк. Ягъни, Казанда юллар аз. Мәсәлән, Нью-Йоркта нисбәт 12%, юллар 10 тапкыр күбрәк, Мәскәүдә 4 тапкыр күбрәк, Париж — 15%», - дип аңлатты ул.
Хәнифов билгеләп үткәнчә, түләүле очыш трассалары бер катлы һәм ике катлы (эстакадалы) булырга мөмкин. Эстакадаларда парковка урыннары да булдырырга мөмкин. «Без бу проектларның бәясен исәп тоткан идек», - диде ул.
Әйтик, дүрт хәрәкәт полосасы өчен эстакада конструкциясенең җыелма варианты белән 1 км төзелеш бәясе якынча 2 млрд сум тәшкил итә. Ә парковкалы эстакадалы төзелеш - 3 млрд сумнан артык.
Транспорт министрлыгы башлыгы ассызыклаганча, эстакадалы юллар төзү, юлларны реконструкцияләүгә караганда, күпкә отышлырак була бара. Төзелешнең минималь бәясе җыелма тимер-бетон конструкцияләре булган эстакадага туры килә, дип өстәде ул.
Моннан тыш, докладчы сүзләренә караганда, түләүле юлларны арзанайтырга мөмкин булган инструментлар бар. Мәсәлән, Free flow «Свободный поток» - яңа түләү алу системасы.
Министр шулай ук түләүле очыш трассаларының финанс моделе вариантын тәкъдим итте. «Әгәр без инвесторларны җәлеп итсәк, безгә 50% ка кадәр федераль акча бирелергә мөмкин. Шуңа күрә мондый модель тәкъдим ителә: 30% - инвесторлар акчасы, 50% - федераль бюджет акчалары, 20%- Татарстан акчалары», - дип сөйләде ул.
Хәнифов фикеренчә, хосусый компанияләр, дәүләт корпорацияләре, шәһәр яны торакларын төзүчеләр, эре банклар инвестор була ала. Ә республика акчаларын территорияне әзерләүгә - җир кишәрлекләрен рәсмиләштерүгә, челтәрләрне чыгаруга, корылмаларны сатып алуга һәм сүтүгә, инженерлык эзләнүләренә, проектлауга, проектка дәүләт экспертиза үткәрүгә юнәлдерергә мөмкин.
ТР Президенты матбугат хезмәте фотосы.