Татарстанның Аксубай муниципаль районында «Имин һәм сыйфатлы автомобиль юллары» милли проекты кысаларында төбәк әһәмиятендәге Чистай-Аксубай-Нурлат автомобиль юлының 35,83 км дан 38,43 км га кадәр участогы төзекләндерелгән.
Ремонт барышында 18 200 кв.м мәйданда ЩМА-10 асфальт-бетон катнашмасыннан яңа катлам җәелгән. Биредә шулай ук һәр яктан 2әр метр юл кырыйлары ныгытылган һәм юл тамгасы төшерелгән.
Юл республиканың 3 районын – Аксубай, Чистай һәм Нурлат районнарын тоташтыра.
Эшләрнең проектчысы - «Спецдорпроект» ҖЧҖ, генераль подрядчы - «Татавтодор» АҖ.
Исегезгә төшерәбез, агымдагы елда «Имин һәм сыйфатлы автомобиль юллары» илкүләм проекты кысаларында Татарстанда гомуми озынлыгы 108,3 км булган 77 төбәк юллары ремонтланачак.